Skólaárið 2010-2011

1. Grunnnám á háskólastigi

1.1 Inntökuskilyrði
Umsækjandi þarf að hafa lokið stúdentsprófi og/eða staðist inntökupróf eða lokið öðrum undirbúningi (sbr. lög nr. 63/2006), sem háskólaráð telur jafngildan.  Sérstök inntökupróf eru fyrir ákveðnar námsbrautir.  Umsóknum nemenda, sem ekki hafa lokið stúdentsprófi, skal vísað til kennslunefndar til umsagnar. Nemendur annarra háskóla geta einnig tekið hluta af námi sínu við Háskólann á Hólum enda sé kveðið á um það í sérstökum samningum milli stofnana.

1.2 Inntaka nýnema
Umsækjendur skili umsóknum á skrifstofu Háskólans á Hólum fyrir auglýstan umsóknarfrest. Skólinn skuldbindur sig að svara öllum umsóknum innan mánaðar frá auglýstum umsóknarfresti.
Til að innritast þarf nemandi að standa skil á innritunargjöldum samkvæmt lögum nr. 57/1999. Skólinn innheimtir sérstök gjöld s.s. fyrir verknám og vettvangsferðir.

1.3 Mat á námi
Nemendur sem áður hafa lokið sambærilegum námskeiðum á sama skólastigi og boðið er upp á í námi við Háskólann á Hólum, geta sótt um að fá námskeiðin metin til eininga. Umsókn um mat á fyrra námi skal senda skriflega til kennslunefndar innan mánaðar frá því námskeiðið hefst. Með beiðninni skal leggja fram ítarleg gögn um það nám sem óskast metið. Almennt er ekki metið eldra nám en 10 ára nema þegar um mjög sambærilegt nám er að ræða. Heimilt er að leggja fyrir stöðupróf til þess að meta hæfni nemenda.

1.4 Námseiningar - ECTS
Námið er mælt í ECTS (European Credit Transfer System) einingum. Hver eining endurspeglar heildarvinnu nemenda í náminu s.s. viðveru í fyrirlestrum, æfingum, verklegum tímum, umræðutímum, prófum og verkefnum auk heimanáms. Að jafnaði er miðað við 20 – 30 klukkustunda vinnu á einingu, þar af geta 8 – 13 kennslustundir verið bundnar í stundaskrá.

1.5 Námsframvinda
Nám til diplómagráðu í ferðamálafræði eða í fiskeldi er 90 ECTS, nám til diplómagráðu í viðburðastjórnun er 60 ECTS. Nemendur skulu ljúka diplómagráðu innan fjögurra ára frá fyrstu innritun. Nám til diplómagráðu við hestafræðideild er 60 ECTS í tamningum og 30 ECTS í reiðkennslu og þjálfun.
Nám til B.A./B.S./B.Ed.-gráðu er 180 ECTS, eftirfarandi viðmið gilda um námsframvindu: Nemendur ljúki a.m.k. 40 ECTS á fyrsta ári, 90 ECTS á tveimur árum, 140 ECTS eftir þriðja ár og 180 ECTS eftir fjórða ár.  Nemendur skráðir í hlutanám skulu ljúka 180ECTS eftir sex ár í mesta lagi. Hafi nemandi ekki náð tilskildum einingum eða nær ekki aðaleinkunn þá glatar hann rétti sínum til að halda náminu áfram. Nemandanum er þó heimilt að innritast aftur í námið og fær þá öll námskeið sem hann hefur lokið með einkunninni 7,0 eða hærri metin. Nemendur sem lokið hafa diplómagráðu og óska þess að innritast í B.A./B.S./B.Ed. nám innan sömu deildar fá einingar úr diplóma náminu metnar í samræmi við reglur um hverja námsbraut.

1.6 Lærdómstitlar
Háskólinn á Hólum veitir eftirfarandi lærdómstitla í samræmi við lög nr. 57/1999 og lög nr. 63/2006:
a) Diplóma – tamningamaður
b) Diplóma – þjálfari og reiðkennari
c) Diplóma í reiðmennsku og reiðkennslu - Leiðbeinendapróf
d) Diplóma í tamningum – Tamningapróf
e) Diplóma – ferðamálafræði
f) Diplóma – viðburðastjórnun
g) Diplóma – fiskeldisfræði
h) M.S. í sjávar- og vatnalíffræði
i) M.A. í ferðamálafræði
j) Baccalaureus Scientiarum (B.S.)
k) Baccalaureus Artium (B.A.)

1.7 Sameiginlegar námsgráður
Háskólinn á Hólum getur stofnað til sameiginlegra námsleiða með öðrum háskólum. Sérstakar reglur eru settar um hverja námsleið.

1.8 Kennslufyrirkomulag
Kennsluárið skiptist í haust-, vor- og sumarönn. Haustönn er frá september til desember, vorönn er frá janúar til maí og sumarönn er frá júní til ágúst.  
Mögulegt er að bjóða  námskeið í fjarnámi að hluta til eða öllu leyti. Kennsluháttum og námsmati skal lýst í námskeiðslýsingu og kennsluáætlun hvers námskeiðs. Tímasókn er frjáls, en þó má setja skilyrði um tímasókn einstakra námskeiðshluta, s.s. verklega tíma, verknám og vettvangsnám til að standast námskeiðið. Þetta skal tilgreint í kennsluáætlun sem afhenda ber nemendum við upphaf námskeiðs. Tungumál Háskólans á Hólum er íslenska en heimilt er að bjóða kennslu á öðrum tungumálum enda sé þess getið í kennsluáætlun viðkomandi námskeiðs.

1.9 Reglur um námsmat
a) Í námskeiðslýsingum og kennsluáætlunum kemur fram hvernig staðið er að námsmati og hvort nemendur þurfa að standast alla þætti námskeiðsins. Í kennsluáætlun kemur fram lýsing á þeim þáttum, sem verða metnir (s.s. próf, skrifleg verkefni, verklegar æfingar) og vægi þessara þátta í lokaeinkunn viðkomandi námskeiðs.
b) Lokaeinkunnir í námskeiðum eru vegið meðaltal allra námskeiðshluta og eru gefnar í heilum og hálfum tölum frá 0 - 10. Þær skulu vera reiknaðar með eftirfarandi hætti: Einkunn sem er jöfn eða hærri en 0,75 eða 0,25 skal hækkuð upp og einkunn sem er jöfn eða lægri en 0,74 eða 0,24 skal lækkuð niður. Þannig gefa einkunnir 6,75 til 7,24 einkunnina 7,0 og einkunnirnar 7,25 til 7,74 einkunnina 7,5 o.s.frv. Til þess að ljúka námskeiði verður nemandi að hljóta að lágmarki lokaeinkunnina 5,0. Sé einkunn í námskeiði sett saman úr fleiri en einum námskeiðshluta skal reikna undireinkunnir fyrir hvern hluta með einum aukastaf. Ef nemendur þurfa að standast alla hluta námskeiðs verða þeir að ná einkunninni 5,0 fyrir hvern hluta.
c) Aðaleinkunn er vegið meðaltal einkunna allra námskeiða í viðkomandi námi.  Við lok diplómanáms skulu nemendur hafa náð 5,5 í aðaleinkunn, við lok B.A./B.S./B.Ed. náms skulu nemendur hafa náð 6,0 í aðaleinkunn.
d) Einkunnir eru trúnaðarmál milli skólans og viðkomandi nemanda sbr. lög nr. 77/2000 um persónuvernd og meðferð persónuupplýsinga.

1.10 Regla um skráningu úr námskeiðum
Nemendum er heimilt að skrá sig úr þeim námskeiðum sem þeir eru skráðir í. Skráning úr námsskeiði skal skal skila til skrifstofu skólans innan mánaðar frá því að námskeiðið hefst. Nemendur sem að skrá sig úr námsskeiði eftir að sá tími er liðin teljast hafa þreytt námsskeiðið.

1.11 Reglur um próf, verkefni og endurtökurétt
Reglur um próf
Nemandi sem kemur ekki til prófs sem hann er skráður í og hefur ekki boðað forföll telst hafa þreytt prófið með falleinkunn.
Nemandi sem ekki mætir til prófs vegna veikinda eða annarra samþykktra ástæðna skal tilkynna forföll áður en próf hefst. Læknisvottorði skal skilað til skrifstofu skólans við fyrstu hentugleika og eigi síðar en fimm virkum dögum eftir að próf var haldið, annars telst nemandinn hafa þreytt prófið. Það sama gildir ef nemandi mætir ekki í próf vegna veikinda barns.
Í ákveðnum námskeiðum (sjá einstaka námskeiðslýsingar og kennsluáætlanir) verður nemandi að uppfylla kröfur um mætingu til að eiga próftökurétt.
Lokapróf skal að jafnaði halda í lok hvers námskeiðs. Í skriflegum prófum ræður einingafjöldi námskeiða og vægi prófs lengd próftíma. Að jafnaði skal ætla 1/2 klukkustund fyrir hverja ECTS á lokaprófi.
Nemendur geta sótt um sérúrræði í prófum vegna lesblindu, fötlunar eða annarra álíka ástæðna. Nemendur þurfa þá að skila inn til námsráðgjafa, vottorði frá lækni eða sérfræðingi sem útskýrir og staðfestir ástandið. Umsóknum um sérúrræði í prófum skal skila til námsráðgjafa eigi síðar en mánuði eftir upphaf námskeiðs.
Nemandi á rétt á að fá útskýringar á orðalagi prófspurninga. Kennari sem heldur próf eða staðgengill hans, skal vera tiltækur á meðan próf stendur yfir.
Nemendur mega ekki hafa með sér í próf önnur hjálpargögn en þau sem kennari heimilar, hvort sem um er að ræða lokapróf eða skyndipróf. Notkun farsíma er óheimil í prófum, nema í prófum sem þreytt eru í netumhverfi. Erlendum nemendum er heimilt að hafa orðabækur með sér í próf, hafi þær ekki aðrar en upprunalegar upplýsingar að geyma.
Noti nemandi óleyfileg hjálpargögn, veiti eða þiggi hjálp, hefur hann fyrirgert rétti sínum til prófs í námskeiðinu á viðkomandi skólaári. Verði nemandi uppvís að því að hafa rangt við í prófi skal prófverkefnið og úrlausnin umsvifalaust tekin af nemandanum og sviðsstjóri kennslusviðs eða staðgengill hans kallaður til. Máli nemandans skal síðan vísað til kennslunefndar til úrskurðar. Brot af þessu tagi getur leitt til áminningar eða brottvísunar úr skólanum. Þetta ákvæði á bæði við um lokapróf og skyndipróf.
Kennarar skulu hafa lokið yfirferð prófa og gefið lokaeinkunn eigi síðar en fimmtán virkum dögum eftir að próf er þreytt.
Nemendur eiga rétt á að sjá prófúrlausnir sínar og geta þeir gert athugasemdir við mat kennara á þeim. Vilji nemandi gera athugasemd við einkunn, skal hann skila skriflegum athugasemdum til sviðstjóra kennslusviðs innan mánaðar frá birtingu einkunnar. Hægt er að skjóta ágreiningi um einkunnagjöf til kennslunefndar sem fellir úrskurð varðandi ágreining eða skipar prófdómara. Úrskurðum kennslunefndar má áfrýja til rektors og til áfrýjunarnefndar í kærumálum háskólanema sbr. 20. gr. laga um háskóla nr. 63/2006.
Reglur um verkefni
Í verkefnum skal ávallt geta þess hvaðan texti og upplýsingar eru fengnar og farið rétt með heimildir. Annað telst vera ritstuldur. Verði nemandi uppvís að ritstuldi leiðir það til lækkunar einkunnar fyrir verkefnið og sé um að ræða gróft brot er heimilt að gefa einkunnina núll fyrir verkefnið.
Nemandi getur óskað eftir framlengingu á skilafresti verkefnis við kennara viðkomandi námskeiðs, sú ósk þarf að berast kennara áður en upphaflegur skilafrestur rennur út og nemandi að tilgreina gildar ástæður. Kennari getur neitað að taka við verkefnum eftir skilafrest.
Hafi nemandi ekki fengið framlengdan skilafrest á verkefni hjá kennara námskeiðsins, telst hann hafa lokið viðkomandi verkefni með einkunninni núll.
Reglur um endurtökurétt
Nemandi sem ekki nær lágmarks lokaeinkunn í námskeiði má endurtaka þá þætti námskeiðs þar sem hann hefur ekki uppfyllt lágmarkskröfur. Standist hann ekki endurtöku viðkomandi námskeiðshluta, má hann endurtaka námskeiðið næst þegar það er haldið, nema annað sé tekið fram í kennsluáætlun. Nái nemandi ekki prófi/verkefnum í námskeiði í þriðju tilraun þarf hann skrá sig aftur í námið og endurtaka þau námskeið þar sem hann hefur ekki náð einkunninni 7,0.

Skólinn innheimtir sérstakt prófgjald fyrir endurtöku- og sjúkrapróf. Upphæð gjaldsins miðast við raunkostnað skólans vegna endurtöku prófa og endurtöku verkefna.
Við endurtöku verkefnis skal að jafnaði vera skilafrestur eigi síðar en tveim vikum eftir að nemanda er birt falleinkunn í viðkomandi verkefni. Nemandi sem endurtekur verkefni getur þó aldrei hlotið hærri einkunn en 5,0 fyrir endurtekið verkefni.

1.12 Lokaverkefni til B.S./B.A./B.Ed. prófs
Lokaverkefni eru hluti af grunnnáminu. Nemandi vinnur lokaverkefni undir stjórn eða umsjón einhvers af kennurum skólans. Nemanda er einnig heimilt að vinna að lokaverkefni undir stjórn annarra sérfræðinga. Í slíkum tilvikum þarf samþykki deildar, sem jafnframt tilnefnir umsjónarmann úr röðum fastráðinna kennara. Frágangur verkefnis skal vera í samræmi við nánari reglur um frágang rannsóknaritgerða við skólann. Deildum er heimilt að útfæra nánari reglur um B.A./B.S./B.Ed. verkefni.

1.13 Mat á lokaverkefnum
Mat á lokaverkefnum er í höndum utanaðkomandi prófdómara, leiðbeinanda og umsjónarmanns, ef við á. Gildir meðaltal einkunna þeirra sem lokaeinkunn.

2. Framhaldsnám

2.1 Svið framhaldsnáms
Svið framhaldsnáms hefur yfirumsjón með framhaldsnámi sbr. 8. gr. í Starfsreglna Háskólans á Hólum.

2.2 Umsóknarfrestur
Umsóknarfrestur um framhaldsnám til meistaragráðu við Háskólann á Hólum er til 15. mars fyrir nám sem hefst á haustmisseri og til 15. september fyrir nám sem hefst á vormisseri.

2.3 Meðferð umsókna
Ferli umsókna um meistaranámið er eftirfarandi:
a) Nemandi sækir um inngöngu í meistaranám á sérstökum eyðublöðum sem fást á skrifstofu Háskólans á Hólum. Umsókn um meistaranám skulu fylgja drög að náms- og rannsóknaráætlun sem unnin er í samvinnu við kennara við Háskólann á Hólum. Liggi fyrir drög að umsókn til sjóða, sem fjármagna eiga rannsóknarverkefnið, skulu þau fylgja umsóknum. Umsókn skal skilað á skrifstofu Háskólans á Hólum, sem skráir hana og sendir til framhaldsnámsnefndar.
b) Framhaldsnámsnefnd afgreiðir umsóknir og skipar umsjónarkennara (sbr. gr. 3.6 í námsreglum) og meistaraprófsnefnd nemandans (sbr. gr. 3.8 í námsreglum). Skrifstofa Háskólans á Hólum tilkynnir umsækjanda niðurstöðu bréflega um leið og hún liggur fyrir. Afgreiðsla framhaldsnámsnefndar er kynnt nemendabókhaldi og viðkomandi deild við fyrsta tækifæri.
c) Afgreiðslu umsókna sem berast fyrir 15. mars skal vera lokið fyrir 25. apríl. Umsóknir sem berast fyrir 15. september skal afgreiða fyrir 15. október.
d) Hafi framhaldsnámsnefnd samþykkt umsókn, skal nemandi snúa sér til skrifstofu Háskólans á Hólum og skrá sig til náms. Skráning vegna náms sem hefjast skal á haustmisseri skal fara fram í síðasta lagi 1. júní, en 30. nóvember fyrir nám á vormisseri.

2.4 Inntökuskilyrði
Til að geta innritast í nám til meistaraprófs við Háskólann á Hólum þarf nemandi að hafa lokið B.S./B.A./B.Ed. prófi með lágmarkseinkunn 6,5 eða sambærilegu prófi sem framhaldsnámsnefnd viðurkennir. Heimilt er að víkja frá ákvæðum um ofangreindar lágmarkseinkunnir ef fyrir liggja rökstuddar ástæður.

2.5 Einingafjöldi, tímalengd og samsetning náms
Nám til meistaraprófs (M.A. / M.S.) er 120 ECTS (að jafnaði tveggja ára full vinna). Meistaranám skal innihalda rannsóknarverkefni (30, 60 eða 90 ECTS), sem unnið er undir leiðsögn sérfræðinga við Háskólann á Hólum eða annarra sérfræðinga sem framhaldsnámsnefnd samþykkir. Einnig þarf nemandi að sækja námskeið (30, 60 eða 90 ECTS), sem samþykkt eru af meistaraprófsnefnd.
Sjái nemandi fram á að geta ekki lokið náminu á tveimur árum, skal hann sækja um áframhaldandi innritun til framhaldsnámsnefndar, þó þannig að heildarnámstími verði ekki lengri en þrjú og hálft ár. Í sérstökum tilfellum, t.d. ef nemandi stundar nám sem hlutastarf, getur framhaldsnámsnefnd samþykkt námstíma allt að fimm árum.

2.6 Umsjónarkennari og leiðbeinandi
Sérhver nemandi skal frá upphafi náms hafa umsjónarkennara úr hópi fastra kennara (þeirra sem hlotið hafa hæfnisdóm til að gegna stöðu háskólakennara skv. lögum um háskóla nr. 63/2006 ). Nemandi ráðfærir sig við umsjónarkennara sinn um skipulag námsins, val námskeiða og annað sem tengist náminu.
Leiðbeinandi leiðbeinir nemanda í lokaverkefni. Umsjónarkennari og leiðbeinandi eru að jafnaði sami maðurinn. Deildin getur þó heimilað nemanda að hafa utanaðkomandi leiðbeinanda sem uppfyllir þær kröfur sem gerðar eru í þessum reglum (sbr. 3.7).

2.7 Kröfur til umsjónarkennara og leiðbeinanda
Umsjónarkennari skal vera fastur kennari í viðkomandi grein. Leiðbeinandi nemanda í framhaldsnámi skal vera viðurkenndur sérfræðingur á viðkomandi sviði og hafa birt ritsmíðar í ritrýndum alþjóðlegum tímaritum á sviðinu. Rannsóknarverkefni nemandans skal vera á sérsviði leiðbeinandans.

2.8 Meistaraprófsnefnd
Meistaraprófsnefnd skal skipuð minnst tveimur sérfróðum mönnum og er annar þeirra umsjónarkennarinn. Heimilt er að skipa þriðja manninn í nefndina ef þurfa þykir. Framhaldsnámsnefnd skipar meistaraprófsnefndina. Hlutverk hennar er að fylgjast með því að framvinda námsins sé í samræmi við námsáætlun og tryggja fagleg gæði rannsóknavinnunnar í samræmi við reglur Háskólans á Hólum. Nefndin metur framvindu námsins og gæði vinnunnar út frá frammistöðu nemanda. Nefndin metur lokaritgerð ásamt prófdómara.

2.9 Prófdómarar
Prófdómari, tilnefndur af meistaraprófsnefnd og skipaður af framhaldsnámsnefnd, skal leggja mat á lokaverkefni meistaranema ásamt prófnefnd (sbr. gr. 3.10). Prófdómari skal að öllu jöfnu ekki vera starfsmaður Háskólans á Hólum.

2.10 Námsmat í meistaranámi
Greinargóð lýsing á rannsóknarverkefni og rannsóknaráætlun skal í síðasta lagi liggja fyrir í lok 2. annar. Innan eins árs frá upphafi náms til meistaraprófs skal nemandi halda opinn fyrirlestur (t.d. á málstofu) þar sem fræðilegar forsendur rannsóknarverkefnis eru reifaðar, rannsóknaráætlun er skýrð og fyrstu niðurstöður kynntar ef við á. Einnig leggur meistaraprófsnefnd mat á framvindu námsins og hvort nemanda skuli leyft að halda áfram meistaranámi. Ef meistarprófsnefndin metur það svo að nemanda skuli synjað um áframhaldandi nám skal framhaldsnámsnefnd einnig fjalla um og skera úr um málið. Nemanda skulu þá kynntar niðurstöður matsins með fullnægjandi rökstuðningi.
Rannsóknarverkefni til meistaraprófs lýkur með því að nemandi leggur fram ritgerð og heldur fyrirlestur um verkefnið. Um leið og ritgerð er lögð fram skal jafnframt leggja fram staðfest yfirlit um námsferil nemanda til mats meistaraprófsnefndar. Ritgerð og fyrirlestur skulu metin af prófnefnd, sem í sitja leiðbeinandi, fulltrúi úr meistaraprófsnefnd og prófdómari. Vörn skal stýrt af kennara/sérfræðingi innan viðkomandi deildar. Prófnefnd gefur eftirfarandi umsagnir:
Staðið með ágætum – Framúrskarandi vinna án athugasemda.
Staðið – Minni háttar athugasemdir við ritgerð sem nemi lagar í samráði við  umsjónarmann.
Staðið með skilyrðum – Nemandi þarf að gera viðamiklar breytingar á ritgerð sem bornar eru undir meistaraprófsnefnd og prófdómara.
Fallið – Ófullnægjandi árangur. Nemanda er heimilt að endurbæta verkið og verja aftur.
Lágmarkseinkunn í námskeiðum á framhaldsnámsstigi er 6,0.

2.11 Skil og frágangur lokaverkefna
Meistaraprófsritgerð skal leggja fullbúna fyrir meistaraprófsnefnd og prófdómara minnst tíu dögum fyrir próf og lokafyrirlestur meistaranema. Endanlegri útgáfu meistaraprófsritgerðar skal skilað eigi síðar en einum mánuði frá vörn, nema prófnefnd ákveði annað. Ritgerð skal vera á íslensku eða ensku en útdráttur á báðum tungumálum skal fylgja hverri meistaraprófsritgerð.

3.12 Tengsl við aðra háskóla
Hluta meistaranáms má stunda við aðra háskóla eða viðurkenndar rannsóknastofnanir.

2.13 Lærdómstitlar
Meistarapróf veitir rétt til lærdómstitilsins Magister Scientiarum (M.S.) eða Magister Artium (M.A.).

3. Málskotsréttur nemenda

3.1 Niðurstöður prófa og úrskurðir deilda
Nemendur geta áfrýjað niðurstöðum námsmats og öðrum úrskurðum deilda til kennslunefndar í grunnnámi en framhaldsnámsnefndar ef um framhaldsnám er að ræða.

3.2 Úrskurðir kennslunefndar og framhaldsnámsnefndar
Úrskurðum kennslunefndar og framhaldsnámsnefndar er hægt að áfrýja til rektors, sem tekur endanlega ákvörðun um niðurstöðu skólans.

3.3 Áfrýjunarnefnd í kærumálum háskólanema
Nemendur geta samkvæmt 20. gr. laga um háskóla nr. 63/2006 og reglum menntamálaráðuneytis nr. 1152 skotið máli sínu til áfrýjunarnefndar í kærumálum háskólanema.

4. Staðfesting á reglum
Reglur þessar öðlast gildi þegar háskólaráð hefur samþykkt þær.