Er ég hóf nám í Háskólanum á Hólum áttu hótelsstörf og -rekstur hug minn allan. Eftir árin þrjú á Hólum breyttist áhugi minn heilmikið og opnuðust augu mín fyrir því hversu óendanlega margir möguleikar tengjast ferðaþjónustu á Íslandi. Í náminu er lögð mikil áhersla á menningu annarsvegar og útivist hinsvegar ásamt öðrum námsgreinum

sem nauðsynlegar eru til að einstaklingar hafi grunn til þess að starfa sjálfstætt. Námið er því ákaflega fjölbreytt og áhugavert. Utan um námið heldur faglegur og skemmtilegur deildastjóri sem sér til þess að námið er einstaklingsmiðað á sama tíma og það er þverfaglegt. Nálægðin við kennara og starfsmenn skólans hentaði mér vel og hefur orðið til þess að ég hugsa enn um að fara „heim að Hólum“ þó ég sé nú flutt þaðan.

Á meðan náminu stóð komumst við nemendur í kynni við marga einstaklinga bæði úr fræðiheiminum og þá sem starfa við ferðaþjónustu á einn eða annan hátt. Þó mér hafi ekki verið það ljóst á meðan ég dvaldi á Hólum þá hefur það reynst mér ákaflega dýrmætt eftir að á atvinnumarkaðinn var komið.

Námið hefur opnað margar dyr í atvinnumálum fyrir mig og sem dæmi hef ég starfað sem fararstjóri á Krít, landvörður í Skaftafelli og starfa nú sem verkefnastjóri á Fræðasetri Háskóla Íslands á Hornafirði, þar sem vinna mín snýst um þróunar- og rannsóknarverkefni af ýmsum toga tengd ferðaþjónustu.

Sandra Björg útskrifaðist með BA gráðu í ferðamálafræði vorið 2008.