Á myndinni eru frá vinstri: Víkingur deildarstjóri hestafræðideildar, Skúli rektor,
Rósa forstöðumaður bókasafns, Magnús og Arna Björg forstöðumaður Söguseturs
íslenska hestsins. Brotabrot af gjöfinni fyrir framan þau.

Magnús Sigurðsson læknir og hestamaður færði Háskólanum á Hólum og Sögusetri íslenska hestsins veglega gjöf við athöfn í dag.

Magnús sem komin er yfir áttrætt hefur í gegnum tíðina safnað orðum og orðatiltækjum sem tengjast hestum og hestamennsku. Við starfslok hellti Magnús sér svo að fullu í verkefnið og vann ötullega og markvisst að gerð orðasafns á þessu sviði. Hann leitaði víða fanga m.a. í útkomnum orðabókum, fornritum, íslenskum bókmenntum, fagbókum um hestinn og í erlendum ritum. Tilgangurinn með orðabókinni var að safna sem flestu um hesta og notkun þeirra allt frá því fyrir Íslandsbyggð. Magnús hafði og í huga að gömul orð sem ný gætu komið til góða í framtíðinni þegar fjölbreytni verður meiri í hestaíþróttum og annarri hestamennsku. Magnús kallar orðasafn sitt Orðfák.

Auk þess að afhenda Háskólanum á Hólum og Sögusetri íslenska hestsins Orðfák til varðveislu og vinnslu færði hann skólanum og setrinu stórt og mikið safn gagna sem hér greinir:

- Íslenskar bækur (fræðirit, bókmenntir á íslensku)
- Erlendar bækur (fræðirit, bókmenntir á erlendum málum)
- Tímarit (Hesturinn okkar, Eiðfaxi, Pony Post, á íslensku, þýsku og fleiri málum)
- Blöð (íslensk og erlend)
- Ljósrit (bækur, tímarit - á íslensku og erlendum málum)
- Hestastyttur og fleira þess háttar (úr gibsi, gleri, málmi, plasti, leir og tré)
- Myndir (málaðar, teiknaðar, ljósritaðar, prentaðar og saumaðar)
- Blaðaúrklippur og fleira

Það skal undirstrikað að safnið er mikið og merkt og er það mikill fengur fyrir allt fræðastarf sem tengist hestum og hestamennsku á Hólum. Gjöfin eflir bókasafnið umtalsvert. Sögusetur íslenska hestsins og Háskólinn á Hólum eru þakklát Magnúsi fyrir mikilvægt starf í þágu íslenskrar tungu og menningar, höfðinglega gjöf og þann hug sem hann ber til Hóla í Hjaltadal og þess starfs sem hér er unnið.

Arna Björg flytur inngang að athöfninni og útskýrir gjöfina og tilkomu hennar.

Magnús fylgir gjöfinni úr hlaði.

Skúli Skúlason rektor tók við gjafabréfi frá Magnúsi og hélt síðan þakkarávarp.

Dóttir Magnúsar, María, var með honum í för.

Magnús var heillaður af aðstöðunni á Hólum.
Hann er hér ásamt Víkingi deildarstjóra hestafræðideildar.

Í kirkjunni ásamt Hólabiskupi Jóni Aðalsteini Baldvinssyni.

- Texti: Sólrún
- Myndir: Sólrún og Arna Björg